Читаем Необычайное путешествие в Древнюю Русь. Грамматика древнерусского языка для детей полностью

Како изреку страшную сию и преславную тайну? Что возглаголю или что помышлю? Како начну глаголати и повѣдати дивное сие и преславное слышание? Азъ убо грѣшенъ есмь человѣкъ, но надѣюся на милосердие святаго и великаго мученика и страстотерпьца Христова Георгия; возвѣщаю вамъ чюдо сие, избранное во всѣхъ чюдесехъ его.

Бысть во она лѣта иѣкый градь, именемь Гевалъ, во странѣ Палестиньстѣй, и той бяше великъ зело и множество много людей въ немь; и вси вѣроваху во идолы, почитающе ихъ по преданию и по велѣнию царьскому, отъступиша бо отъ Бога, и Богъ отъступи отъ нихъ.

Близъ же бяше града того езеро велико, имѣя воду многу. По вѣρѣ и по дѣломъ ихъ воздастъ имъ Богъ: бысть убо змий великъ во езерѣ томъ, и, исходя отъ езера оного, людей града того изъядаше. Инѣхъ же свистаниемь уморяше, другыхъ же удавляя восхищаше въ езеро. И бяше скорбь велика и плачь неутѣшимъ во градѣ томъ звѣря оного ради.

Во единъ же отъ днии собрашася вси людие града того и идоша ко царю своему, глаголяще: «Что сотворимъ — яко погибаемъ злѣ оть змия сего?» Глагола имъ царь: «Азъ, еже ми явиша бози, то и возвѣщаю вамъ, да сотворимъ убо совѣть сии: кийждо васъ во вся дни сына своего или дщерь свою да подасть на снедение змию по ряду, дондеже и на мя приидеть число. Дамъ и азъ единородную мою дщерь». И годѣ бысть сей совѣть всѣмъ людемъ, отьвѣщавше рекоша ко царю: «Воистину, о царю, сердце твое въ рукахъ боговъ есть; благодать же исповѣдуемъ имъ, отькрывшимъ тобѣ совѣть сей». И шедше по ряду творяху повелѣние царево, наченше оть большихъ князь и до нижнихъ, и по вся дни чада своя даяху на пищу змиеви при край езера, овъ убо сына своего, другый же дщерь свою, кричаще и плачюще зѣло. Исхожаше змий и восхищаше и ядяше.

Егда же вси людие отьдаша своя чада, абие пришедше, рекоша ко царю: «Владыко, вси мы отьдахомъ своя чада единъ оть другаго, каждо насъ по ряду. Что убо велиши по сихъ?» И отвѣщавъ царь и рече: «Дамъ и азъ единородную мою дщерь, и по сихъ, еже ми явять безсмертнии бози, то паки и совѣщаемъ». Призвавъ же царь единородную свою дщерь и облече ю въ багряницю и облобызавъ ю, и плакася много, и повелѣ вести ея на погибель ко змию. Приведше же и поставиша ю при езерѣ.

Святый же и великый мученикъ и сграстотерпець Христовъ Георгие, почтенный оть небеснаго царя воинъ, и по смерти живый, сияя великыми чюдесы, по смотрению убо Божию хотя спасти насъ погыбающихъ и избавити града нашего оть великыя бѣды, въ той убо часъ приста на мѣстѣ томъ, якоже некий воинъ, грядый оть рати и со тщаниемь во свое отечество идый. Видѣвъ же отроковицю великый и преславный мученикъ Георгий при край езера, и вопроси ея, глаголя: «Что зде стоиши, отроковице?» Она же рече ему: «Отойди, господи мой, отсюду, скоро отойди, да не зле умрѣши». Отьвещавъ же святый Георгий, и рече ко отроковици: «Что глаголеши, о дѣвице, разбойници ли суть здѣ или ино что?» Отроковица же рече: «Змий есть страшенъ, внутрь гнездяся во езере семь; ныне убо молю тя, господи мой, отьступи отсюду: вижу убо добрый твой зракъ и возрасть, и свѣтлость, да не зле умреши». Глагола ей святый и великый мученикъ Георгий: «Ты же почто седиши зде, а не отьходиши?» Глагола отроковица: «Много есть слово мое, еже изрещи тобѣ и сказати, еже о мнѣ, еда како приидеть змий и тебе со мною восхытить». И глагола ей святый и великый мученикъ Георгий: «Рци ми, отроковице, истину, не бойся — не оставлю тебѣ». И отвеща ему отроковица трепещущи: «Видиши ли, господи мой, яко градъ сей великъ и добръ есть зѣло, и велие угобзение его во всемъ: и не хощеть отець мой изыти и оставити градъ сей. Есть убо здѣ змий великъ и страшенъ зѣло во езере семь, и снедаеть людей много, и совѣщаша гражане со царемь отцемь моимь; и даша по вся дни кийждо ихъ по ряду чада своя въ пищу змиеви; прииде же рядъ и на царя, отца моего, и мене, единородну имѣя дщерь едину и не хотя разорити повелѣния своего, повелѣ и мене дати на снѣдение змию. И уже, господи мой, вся тебъ исповедахъ; отъиди отсюду скоро, преже даже не приидеть змий и не восхитить тя».

Слышав же сия великый мученикъ и страстотерпець Христовъ Георгий, и глагола къ женѣ«Не бойся, отроковице!» Абие же возрѣвъ на небо рабъ Божий и помолися, глаголя: «Безначальне, живоначальне, Боже всего мира, не имый начала ни конца, положивый времена и лѣта, солнце на область дний, луну же на просвещение нощи, по-слушавый святыхъ твоихъ апостолъ, пославъ имъ духъ той святый, послушай и мене, недостойнаго раба твоего, и покажи на мнѣ древняя твоя милости и покори лютаго сего звѣря под ногама моима, да видять и вѣру имуть вси, яко ты еси единъ Богь и развѣ тебе иного не вѣмы». И прииде ему гласъ съ небеси глаголя: «Дерзай, Георгие!»