Разбиша ум мой разбойницы, и оставиша мя в язвах, еле жива, прегрешений моих, но исцели мя, отцев Боже. Слава:

Безплодие зря многоболёзненныя души моея, еще потерпи, Христе, и не посецы мене, якоже смоковницу оную проклятую, отцев Боже.

И ныне:

Даждь ми помощь, молитвами Твоими, Всечистая, прилоги отражающи лютых обстояний.

Песнь 8

Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети; Тя превозносим во вся веки.

Камень отвалив ожесточения, Господи, от моего сердца, умерщвленную страстьми воздвигни душу мою, Благий, и принести Тебе ваия, яко Победителю ада, во умилении, Владыко, сподоби: яко да вечный живот улучу, Едине Человеколюбче, песнословя Твою державу и благоутробие Твое во вся веки.

Неподобными обогатихся, окаянный, помышленьми, душу оскверних беззаконными сластьми, и тьма окружает мя отчаяния: озари мне сияние, Боже мой, покаяния, яко да прославлю Тя благодарно во вся веки.

Слава:

Греховным недугом истаяваем, на одре отчаяния низлежу; темже мя, Врачу болящих, посети Твоим человеколюбием и не остави мя уснути люте в смерть, Всещедрый, да вопию Тебе, милости Подателю: Господи, слава Тебе.

И ныне:

Мати Божия, Всесвятая, Стено христиан, избави раба Твоего, обычно зовущаго Ти прилежно, противостани скверным и возносливым помыслом, да вопию Ти: радуйся, Приснодево!

Песнь 9.

Ирмос: Бога человеком невозможно видети, на Негоже не смеют чини Ангельстии взирати; Тобою же, Всечистая, явися человеком Слово Воплощенно, Его же величающе, с небесными вои Тя ублажаем.

К Тебе прибегаю, Иисусе Сыне Божий, мене ради, окаяннаго, рабий зрак приемый: предстательством Безплотных Твоих помилуй мя.

К Тебе припадаю, Избавителю мой, молитвами Предтечи Твоего и всех Твоих пророков и праотцев помилуй мя.

К Тебе воздыхаю, Человеколюбче, грешников едино прибежище и надежда, Спасе всех, моленьми учеников Твоих, Тебе, Спаса нам проповедавших, помилуй мя.

К Тебе воздею руце мои, пострадавый за грешников, Сыне Божий, молитвами мучеников Твоих, кровь свою Тебе ради излиявших, помилуй мя.

Слава:

Несмь достоин воззрети и видети высоту небесную от множества неправд моих, слячен многими ужами железными, во еже не возвести главы моея. Но, о Благоутробный Господи, на мне яви всю благость Твою и недостойна суща спаси и помилуй молитвами преподобных Твоих.

И ныне:

За благость Твою от Пресвятыя Девы родитися и на земли с человеки пожити изволивый, Слове Божий, Тоя предстательством и всех святых Твоих, от века Тебе угодивших, помилуй мя.

Канон умилительный ко Господу нашему Иисусу Христу

Песнь 1, глас 2

Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть: препрославленный Господь, славно бо прославися.

Иисусе сладчайший, спаси мя.

Иисусе Сладчайший Христе, Иисусе долготерпеливе, души моея язвы исцели, Иисусе, и услади сердце мое, Многомилостиве, молюся, Иисусе Спасе мой, да величаю Тя, спасаемый.

Иисусе Сладчайший Христе, Иисусе, отверзи покаяния ми дверь, человеколюбче Иисусе, и приими мя, Тебе припадающа и тепле просяща, Иисусе Спасе мой, согрешений прощения.

Слава: Иисусе Сладчайший Христе, Иисусе, исхити мя из руки льстиваго велиара, Иисусе, и сотвори деснаго предстоятеля славы Твоея, Иисусе Спасе мой, части шуия мя избавляяй.

И ныне, Богородичен: Иисуса рождшая Бога, Владычице, моли о непотребных рабех, Пречистая, яко да муки молитвами Твоими избавимся, Нескверная, оскверненнии, славы присносущныя наслаждающеся.

Песнь 3:

Ирмос: На камени мя веры утвердив, разширил еси уста моя на враги моя. Возвесели бо ся дух мой, внегда пети: несть свят, якоже Бог наш, и несть праведен паче Тебе, Господи.

Услыши, человеколюбче Иисусе мой, раба Твоего, вопиюща во умилении, и избави мя, Иисусе, осуждения и муки, едине долготерпеливе, Иисусе Сладчайший многомилостиве.

Подыми раба Твоего, Иисусе мой, припадающа со слезами, Иисусе мой, и спаси, Иисусе мой, кающагося мя и геенны, Владыко, избави, Иисусе Сладчайший многомилостиве.

Слава: Время, Иисусе мой, еже дал ми еси, во страсти иждих, Иисусе мой. Темже, Иисусе мой, не отвержи мя, но воззови, молюся, Владыко Иисусе Сладчайший, и спаси.

И ныне, Богородичен: Дево, рождшая Иисуса моего, моли избавити мя геенны, едино предстательство оскорбляемых, Богоблагодатная, и сподоби мя жизни, Всенепорочная, нестареющияся.

Седален, глас 1. Подобен: Гроб Твой: